На 5 април 2025 година, во пријатната атмосфера на хотел „Милениум“ во Битола, се одржа првиот модул од циклусот обуки предвидени во рамките на проектот „Зајакнување на млади жени – пат кон еднакви можности“, кој го спроведуваме со поддршка на Националната агенција за европски образовни програми и мобилност преку Еразмус+ програмата на Европската Унија.
Проектот има за цел да ги оспособи младите жени – особено Ромки и девојки со помалку можности – за активно учество во општествените процеси преку развој на лидерски, застапувачки и комуникациски вештини. Целната група се млади девојки на возраст од 15 до 29 години, кои се соочуваат со различни форми на маргинализација, дискриминација и ограничен пристап до образование и вработување.
👩🏫 Првиот модул беше посветен на темата: „Основи на застапување и јавни политики“. Обуката ја реализираше Јасна Пајковска, користејќи интерактивен пристап, неформално образование и активности кои го поттикнуваат критичкото размислување, личната рефлексија и тимската соработка.
Во текот на денот, учесничките:
-
научија што претставува застапување и зошто нивниот глас е важен;
-
се запознаа со основните механизми на креирање јавни политики;
-
работеа на реални студии на случај поврзани со проблеми како што се дискриминација во образованието, ран брак, културни бариери и недостапност до младински активности;
-
учествуваа во симулации со улоги каде практикуваа преговарање и изразување на лични ставови пред претставници на институции;
-
креираа свои пораки и слогани за застапување.
🌟 Преку активно вклучување, споделување на лични искуства и соработка во групи, младите жени направија прв чекор кон станување силни и гласни застапнички за себе и својата заедница.
🔜 Во наредните месеци следуваат уште два модули, посветени на комуникациски вештини и развој на предлог-политики, како и менторска поддршка и презентација на резултати пред локални институции.
Проектот „Зајакнување на млади жени – пат кон еднакви можности“ претставува важен чекор во градењето инклузивно и праведно општество во кое гласот на младите девојки се слуша, вреднува и претвора во конкретни промени.
