Во периодот од 13 до 16 април 2025 година, Здружението за развој на ромската заедница СУМНАЛ учествуваше на завршната средба на партнерите и Европската конференција на проектот „pROceed goes practice“, која се одржа во Халандри, Грција. Овој проект, финансиран од Европската Унија, има за цел да го подобри пристапот до вработување за Ромите преку професионална ориентација и подготовка за вклучување на пазарот на труд.
🤝 Завршна средба на партнерите (13–14 април)
Првите два дена беа посветени на координација помеѓу партнерските организации, размена на искуства, финализирање на извештаи и анализа на постигнатите резултати. Нашите претставнички, Фатма Бајрам Аземовска и Викторија Михајловска, активно учествуваа во работните сесии, при што го претставија искуството на СУМНАЛ во полето на социјална инклузија, образование и вработување на Роми во Северна Македонија.
🎤 Европска конференција (15 април)
На конференцијата, која обедини претставници од повеќе европски земји, Фатма Бајрам Аземовска беше една од главните говорнички, каде зборуваше за важноста од професионална ориентација и системска поддршка за младите Роми, како и за клучната улога на локалните граѓански организации во процесите на инклузија.
Презентирани беа и:
-
Прирачници и едукативни материјали за работа со возрасни Роми;
-
Водич за професионална ориентација на млади;
-
Алати за работодавци за промовирање на инклузивно вработување;
-
Преглед на добри практики и мерки од секоја земја-партнер.
СУМНАЛ беше дел од панелот за проценка на ефективноста на спроведените мерки, заедно со партнери од Србија, Унгарија, Словачка, Романија, Бугарија и Грција. Викторија Михајловска даде значаен придонес со практични согледувања од терен, базирани на обуките реализирани во рамки на проектот во Северна Македонија.
Горди сме што СУМНАЛ е дел од европска иницијатива која создава реални можности за образование, вработување и инклузија на Ромите. Искрената соработка и споделувањето на знаење со европските партнери претставува силен мотив да продолжиме со нашата работа – во служба на заедницата, еднаквоста и иднината на младите.