На 5 август 2024 година, во просториите на Здружението за развој на ромската заедница „Сумнал“ во Битола се одржа предавање за превенција од семејното насилство. Семејното насилство и насилството врз жени и девојчиња претставуваат кривични дела за кои насилникот одговара пред надлежните институции, а жртвата добива соодветна заштита.
Секоја жртва на насилство која ќе се јави да пријави насилство ќе добие бесплатна помош и поддршка, информации за своите права и заштита обезбедена од институциите. Исто така, жртвата може да биде придружувана до институциите доколку се чувствува несигурно.
Мерки за заштита вклучуваат:
Обезбедување нужно сместување: Жртвите на насилство може да бидат сместени најмалку три месеци, со можност за продолжување до една година.
Обезбедување соодветна здравствена заштита: Гарантиран пристап до потребните медицински услуги.
Обезбедување соодветна психосоцијална интервенција и третман: Жртвите добиваат поддршка за менталното здравје и советување.
Упатување во соодветно советување: Насочување кон соодветни услуги за поддршка.
Обезбедување правна помош и застапување: Жртвите добиваат правна помош и застапување.
Покренување постапка до надлежниот суд: Преземање дејства за остварување правда преку судовите.
Поднесување барање до судот за изрекување привремени мерки за заштита: Можност за добивање на забрани за приближување или други мерки за заштита.
Доколку трпите насилство и Ви е потребна помош и поддршка, не се двоумите да пријавите. Полицијата не може „само да дојде и да го заплаши“ — морате да го пријавите насилникот на телефонските броеви 192 или 112 (бесплатен телефонски број).
Доколку сте физички повредена и треба да извадите лекарско уверение, тоа е бесплатно.
Им благодариме за предавањето на Мирјана Недановска, началник на Отсек за превенција – СВР Битола, Ките Трајковски, самостоен инспектор во Отсек за превенција – СВР Битола и Каролина Димеска, самостоен инспектор во Отсекот за превенција – СВР Битола.
Во наредниот период најавуваме активности со цел превенција и подигнување на свеста.
Соработката помеѓу полицијата и нашата невладина организација е важна бидејќи овозможува комбинирање на ресурси и експертиза за поефикасно справување со семејното насилство и обезбедување сеопфатна поддршка и заштита на жртвите.